واني راجع من الشغل تذكرت ماعدنه موز بالثلاجة، وفكرة انزل من السيارة اشتري وارجع اصعد هاي فكرة تعبانه لان راجع من الشغل مالي خلك، عبرت اكثر من واحد يبيع موز بس سبحان الله، السيارة وكفت كبال واحد يبيع موز من هذا الي بيه شام، كلت خلاص هذا رزقه، نزلت اشترين كيلوين وصعدت، كلشي بيه شامات حلو ولذيذ واني مااقصد الموز. حتى ماتضيع السالفة، هاي قبل سنوات طويلة وتقريبا بفترة المراهقة وبعدها همين بشوية جنت مااهتم اذا شعري طول وصار مخربط ولا اهتم اذا لحيتي صارت طويلة، مع الاخذ بالاعتبار لحيه المراهقه كم شعرايه تشبه الوصاخه الي تصير جوه الثلاجه، بس هم تعتبر لحيه، جنت اعوفها طويلة وعادي وميهمني شكلي ابدا. بس من كبرت شوية صار روتين ثابت كل شهر مرتين او ٣ ومرات اجتهد واخرب الدنية بالبيت لان اتعاجز وماحب كرسي الحلاق ولا كرسي طبيب الأسنان ولا احب اكعد على اي كرسي .. بس عادي احب اكعد بحضنها. كل هذا الخرط حتى اوصل لحسام الحلاق الي اول ماكعدت بالمنطقة الي اني ساكن بيها دورت على حلاق، والحلاق للرجال من الثوابت مثل النادي الي تشجعه طول عمرك رغم مرات يجلطك مثل الي يشجعون برشلونة لو يفرحك مثل الي يشجعون ريال مدريد وهكذا .. هامش اني اشجع نادي الزمالك ولك ان تتخيل شصاير بيه وبكلبي. طبعا انت منتظر السالفة تبدي واني هم مثلك بس الصبر مفتاح الفرج، ومثل ماكال الشاعر: يكولون الصبر للفرج مفتاح، طلع لوتي الصبر حولها بصمه. بالعادة حسام من اخابره مااسلم عليه راسا أسئلة شي ميخص الحلاقة مثلا اكله حسام اثبتلي شكد تحبني لو اكله شنو رأيك بفلان شي وهكذا. البارحة اتصلت عليه وسئلته حسام شلونه لعب المنتخب؟ على اعتبار لعبه العراق والبحرين وفزنه بيها، جاوبني هذا اللعب زبلي بمعنى منتخب زبالة، وراها حجزت الموعد مال حلاقة وزينت والزيان جان حلو بس بقيت ماعندي حبيبه. حتى ماانسه حسام الي كال المنتخب زبلي، باللعبة الي صارت بالبصرة قبل فترة، حسام راح شاف اللعبة هناك ورجع متمرض وصوته رايح من التشجيع وبنفس الوقت يكول زبلي عليهم، ماتعرف الانسان مرات شلون يصرف. شنو يحجي ع المنتخب شنو يحجي عليه؟ ماتطلع هاي التصرفات الغريبة بس من الانسان يحب، ومااقصد بس المنتخب، احنه من نحب نتصرف بغرابه، مدري وين قريت ذاك اليوم، ان الحب واحد من اشد انوع الكذب والوهم، بس حبي الها جان حقيقي. يله مالنه علاقة الله يسامحه، اقول قولي هذا واستغفر الله لي ولكم. - @d_f434