@almaty.dps: Бүгін ҰҚК Шекара қызметі Алматы облысы бойынша департаментінің жеке құрамы 4 маусым – Қазақстан Республикасының Мемлекеттік рәміздер күнін жоғары деңгейде атап өтті. Бұл мереке – елдің Тәуелсіздігін, егемендігі мен бірлігін бейнелейтін маңызды күн. Іс-шараға департаменттің Қарасай және Райымбек аудандары бойынша шекара басқармаларының, сондай-ақ Сержанттар құрамын даярлау бөлімінің әскери қызметшілері қатысты. Мерекенің құрметті қонақтары ретінде Алматы қаласының әкімі, Алматы облысы Ұйғыр ауданы мен Алматы қаласы Түрксіб ауданы әкімдіктерінің өкілдері шақырылды. Шараның маңыздылығын Алматы қаласының Мемлекеттік мұрағаты қызметкерлерінің қатысуы арттыра түсті. Аталған мұрағат өкілдері Қазақстанның мемлекеттік рәміздерінің қалыптасу үдерісін бейнелейтін тарихи материалдарды таныстырды. Мерекелік бағдарлама аясында патриоттық рухтағы сөздер айтылып, Мемлекеттік Туды салтанатты түрде көтеру және Мемлекеттік Әнұранды орындау рәсімдері өтті. Қатысушылар Тәуелсіздіктің рәміздеріне құрмет білдіре отырып, олардың өскелең ұрпаққа отансүйгіштік пен азаматтық тәрбие берудегі маңызын атап өтті. Мереке елге деген мақтаныш пен бірлік атмосферасында өтті.
