د کچه خاورو نه جوړ دے ځائے په ځائے په لوګي تور دے دا بوتکي بوتکي چې ښکاري دا زما د جانان کور دے د غرمې دلته اودۀ وي هم د دې څپر د لاندې وچې څانګې پرې پرتې دي د کدو بوټے پرې خور دے د منګو قطار ته ګوره په ګړونج کښې چې پراتۀ دي هم په دغه جام اوبه څښي چې په سور منګي نسکور دے کټوۍ باندې په نغري ده د لرګي څمڅۍ پکښې ده چې نرے لوګے ترې خېژي لګېدلې پسې اور دے دا تنور دَېوال خوا کښې هغه ګټ کښې دونکاچه ده دونکاچې سره په خوا کښې کشمالی بوټی سمسور دے څو چرګان پکښې اخته دي بُوس په پنجو باندې نولي د کوڅې د ور په خوا کښې د څاروو هغه اخور دے د کوهي سره په خوا کښې دا زاړه ونه د توت ده اوس موسم د پسرلي دے د توتانو پکښې زور دے د کوټې په ګوټ کښې ګوره څه په خوند ځانګو ځنګېږی الله للو للو شه ، څنګه خوږ اواز د مور دے لا خو اوس تنور لمبه شو ډوډۍ روستو به پخېږی د دېوال په میخ کښې زوړند ګوره هغسې لا شکور دے د دې کور دا ښکلي خلق څوک به څنګ کړي د نظره دا امېل د اګو ماتو هغه ښکر په بلۍ سور دے په زاړه ماته کټوۍ کښې د ورښاړي سرۀ ګلونه ما ګلونه ډېر لیدلي خو د دې حُسن لا نور دے یو خوا وچ ډکي پراتۀ دي دا خشاک دی د سېزلو بل خوا شنه ګیاه کوَری کښې چا ټومبلی پکښې لور دے مېښه لنګه شوملې ډېرې ډیچکوړی د کوچو ډک دی نن به حلَق زما غوړ شي دا دَ ډېرو ورځو سپور دے په غپ غپ یې ځان ښکاره کړو ځکه ما ترې ډډه وکړه ګنې خلق داسې وایی چې خړ سپے د ګیدړ ورور دے کندو ډک دی د دانو نه څګني فصلونه ښۀ وو اوس دې خپله برخه یوسي په جانان که د چا پور دے هغه جاله د خسڼو د برګو منځ کښې چې ښکاري توته کرکی بهر لاړه د بچو یې پکښې شور دے دا خیرن کور به صادقه تاج محل باندې ورنکړم هغه دلته کښې ووسېږی چې زما دَ زړۀ ټکور دے دَ ډیوټ نه لږ په پورته د برګو نه لږ په ښکته پۀ دېوال کښې یو دَرے دے چې تالے پکښې نسکور دے حسین احمد صادق - @bamsibeyrek.khalid