ប្រជាពលរដ្ឋជាង ២០០០ គ្រួសារ ក្នុងតំបន់ទីទួលសុវត្ថិភាព ត្រូវបានថ្នាក់ដឹកនាំចុះសួរសុខទុក្ខ និងយកចិត្តទុកដាក់បំផុត ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ នារសៀលថ្ងៃទី២៤ ខែកក្កដា ឆ្នាំ២០២៥ បានដឹកនាំក្រុមការងារចុះពិនិត្យស្ថានភាពស្នាក់នៅបណ្តោះអាសន្នភៀសសឹក នៅវត្តភ្នំកំបោរ ឃុំបេង ស្រុកបន្ទាយអពិល ខេត្តឧត្តរមានជ័យ ព្រមទាំងបានផ្តល់តង់សម្រាប់ប្រើប្រាស់ និងរៀបចំបញ្ជូនគ្រឿងឧបភោគ បរិភោគជូនប្រជាពលរដ្ឋ។ ឯកឧត្តម គន់ គីម បានណែនាំដល់បងប្អូនប្រជាពលរដ្ឋទាំងអស់ដែលបានភៀសខ្លួនមកស្នាក់នៅនាពេលនេះសូមរក្សាភាពអត់ធ្មត់និងមានការជឿជាក់មកលើរាជរដ្ឋាភិបាលកម្ពុជាក្នុងការយកចិត្តទុកដាក់គិតគូរខ្ពស់ពីសុខទុក្ខរបស់បងប្អូនប្រជាពលរដ្ឋគ្រប់ពេលវេលាទោះស្ថិតក្នុងកាលះទេសះណាក៏ដោយក៏រាជរដ្ឋាភិបាលមិនចោលបងប្អូនប្រជាពលរដ្ឋនោះទេទោះស្ថិតក្នុងស្ថានភាពបែបណាក៏ដោយ។ គួរបញ្ជាក់ថា បើតាមអ្នកនាំពាក្យរដ្ឋបាលខេត្តឧត្តរមានជ័យបានបញ្ជាក់ថា ៖ ប្រជាពលរដ្ឋជាង ២,៤០០ គ្រួសារ ត្រូវបានជម្លៀសចេញពីតំបន់ជម្លោះក្នុងខេត្តឧត្តរមានជ័យដោយសុវត្ថិភាពអស់ហើយ លោក ម៉េត មាសភក្តី អ្នកនាំពាក្យរដ្ឋបាលខេត្តឧត្តរមានជ័យសូមជម្រាបជូនសាធារណជន ក៏ដូចជាអ្នកសារព័ត៌មានទូទៅជ្រាបថា៖ រហូតមកដល់ពេលនេះ ប្រជាពលរដ្ឋប្រមាណ ១,៥០០ គ្រួសារ ក្នុង ១២ ភូមិ ៣ ឃុំ នៃស្រុកបន្ទាយអំពិល ខេត្តឧត្តរមានជ័យ ដែលរស់នៅក្បែរតំបន់ប្រឈមកំពុងមានជម្លោះប្រដាប់អាវុធរវាងកងទ័ពកម្ពុជា-ថៃ នៅតំបន់ប្រាសាទតាមាន់ ប្រាសាទតាក្របី និងថ្មដូន បានជម្លៀសចេញពីតំបន់គ្រោះថ្នាក់មកទីទួលសុវត្ថិភាព ដោយសុវត្ថិភាពអស់ហើយ។ សរុបរួមទាំងប្រជាពលរដ្ឋមកពីតំបន់ផ្សេងទៀតផង មានប្រមាណជាង ២,៤០០ គ្រួសារ ដែលកំពុងស្ថិតនៅទីទួលសុវត្ថិភាពទាំងអស់ តាមបណ្តាស្រុកក្នុងខេត្តឧត្តរមានជ័យ។ - @chumvon