@user2340661978314: الرد على @naser.morsal في نوع من الرجال لما تسأليه: "إنت عايز شنو من العلاقة دي؟" ما بقدر يجاوب. مرة بيقول ليك "شايف مستقبلي معاك"، وبعد كم يوم بيقول "ما متأكد"، وبعد شوية يرجع "أنا بحبك"، وبعدها يختفي بالأيام كأنك ولا حاجة. تلقي نفسك بقيتي في علاقة ما مفهومة، بتسألي نفسك كل يوم: هو دايرني ولا داير الإحساس بيّ؟ هو بحبني ولا بحب وجودي؟ هو فعلاً شايفني جزء من حياتو، ولا أنا مجرد فترة لحدي ما يقرر؟ والمشكلة إنو الزول الما عارف عايز شنو بيتعبك بدون ما يقصد، يضيعك بين كلمتين حلوات ولحظة وجع، بين وعد ما اكتمل، ونص حب ما كمل. تعيشي في دوامة انتظار، تنتظري يقرر، تنتظري يتغير، تنتظري يوضح، وللأسف الانتظار دا بيسرق منك حاجات كثيرة… بيسرق طاقتك، وكرامتك، وابتسامتك، وحتى إحساسك بنفسك. لو الزول ذاتو ضايع، ما ح يقدر يديك أمان، لأنو الزول البيجهل طريقو ما ممكن يهديك طريقك. ما ح يقدر يحبك صح، لأنو لسه ما حب نفسو صح، وما ح يقدر يختارك بصدق، لأنو لسه ما قادر يختار نفسو بوضوح. وإنتي؟تستاهلي زول عارف قيمتك، عارف عايزك كيف، وعارف عايز يعيش معاك شنو. ما زول كل يوم يقول كلام مختلف ويخليك تضربي أخماس في أسداس. تستاهلي زول جاد، واضح، عندو نية ومسؤولية، ما زول كلامو كتير وأفعالو صفر. لو كل مرة بتلقي نفسك البتبادري بالكلام، البتسألي: "حاصل شنو بينا؟"، "إنت ناوي على شنو؟"، "أنا بالنسبة ليك شنو؟" فإنتي في علاقة ما متوازنة علاقة بتستنزفك بالبطيء الزول الجاد ما بيخلي البت تسأل الأسئلة دي، لأنو هو بنفسو بيوضحها ليها من البداية. ما تضيّعي وقتك مع زول لسه بقرر، الناس اللسه بتقرر ديل، خليهم يقرروا بعيد منك. لأنو وجودهم جنبك ما بزيدك إلا وجع وحيرة. أحياناً، الحسم هو أحنّ حاجة ممكن تعمليها لنفسك. إنك تمشي وتخلي المساحة فاضية لزول جاهز، جاهز يحبك، وجاهز يكون معاك فعلاً، مش بالكلام. فلو حسّيتي إنو هو ما عارف يعمل شنو في حياتو، وما عارف علاقتكم ماشة وين، ما تستني لحدي ما يلقى نفسو فيك، خليه يلقى نفسو بعيد منك، لأنو الزول الما عارف عايز شنو، حيخليك تضيعي حدود نفسك وتتأذي عشان ترضيه، وتضحي عشان تحافظي على شي هو ذاتو ما متأكد داير يحافظ عليه ولا لا. خلي عندك شجاعة تقولى: "أنا ما ح أكون محطة انتظار لزول تايه." لو ما واضح، امشي. لو ما جاد، اقفلي الباب. الوضوح راحة، حتى لو وجع. والضباب تعب، حتى لو كان اسمو حب. 💔 #هزار_حبيبة_البنيات

عاشقة الهدوء

Open In TikTok:

Region: SD

Monday 03 November 2025 05:12:42 GMT