@dr.malakmohamed_: إلى جدتي العزيزة قبل أي شيء احمد الله على كل شيء، وعلى كل ما كتبه لنا، واللهم لا اعتراض. ولكن لم تعد الحياة بعدك حياة يا حبيبتي مفيش أي حاجة حلوة تتعاش من بعدك انتي كنت ليا الحياة اصلا إزاي يكون في بعدك عيشة وحياة اصلا لم ترى عيني ولن ترى مثل طيبة قلبك وحنانك أبدًاااا مفيش حد بعدك حنين عليا زي ما انتي كنتي ولا في حد بيحبني الحب اللي كنت بتحبيه ليا وبجد انا من بعدك مبشوفش غير مشاكل ومصايب، والحمد لله على كل حال طبعًا ، بس انتي روحتي وراحت معاكي البركة كلها بجد الحياة بقت صعبة بجد بجد بجد من بعدك يا حبيبتي وانتي حتى مش موجودة تهونيها علينا، ولا لاقية حد يدعيلي ٢٤ ساعة في الـ٢٤ ساعة من غير ما أطلب زيك مش لاقية حد يدعيلي قبل امتحاناتي ومش عارفة أرن عليكي بعد كل امتحان زي ما كنت بعمل وأقولك عملت إيه وقلبك الملهوف يستنى لحد ما أطمنك وتفرحي لفرحي وتزعلي وتبكي على زعلي كمان ويمكن يكون كمان الموضوع مش مهم أو ميخصكيش بس كان كل اللي يضيقني يضيقك كنتي بتفكري فينا قبل نفسك وتشيلي هم الناس كلها من طيبة قلبك تشيلي هم حاجات كتير و يمكن يكون الموضوع مش مهم لحد اصلا بس انتي كده قلبك كده روحك الطيبه كده يا حبيبتي مفيش حد صبر قدك بجد رغم كل الألم والوجع كنتي بتضحكي مش بس في اخر أيامك لأ من زمان من سنين وأعوام كمان وانتي بين علاج وعمليات وأدوية كتير وبرغم كل ده كنتي بتحمدي ربنا وصابرة على الوجع كله ده حتى قبل ما تروحي بدقيقة واحدة أو أقل كمان ورغم تعبك وألمك في المستشفى بسألك: "عاملة إيه يا حبيبتي؟" تقولي "الحمد لله" وإنتي بتضحكي كمان وسبحان الله تكون اخر جملة تطلع من بقك وتتوفي وإنتي حامدة ربنا ومبتسمة كمان يا الله ربنا يعوّضك بالجنة ونعيمها يارب يا حبيبتي قلبي و روحي حبيبتي وحشتيني قوي بجد بجد وحشني صوتك وضحكتك وكلامك وطيبتك حتى ريحتك وحشاني وحشني صوت نفسك والقعدة الدافية جنبك والكلام معاكي وحشني أن نعتزل عن العالم كله نكون أنا وانتي بس نفسي أتكلم معاكي ونفسي قوي قوي أسمع ضحكتك الجميلة. كان نفسي تكوني معايا دلوقتي وفي حياتي طول العمر وتشوفيني وأنا ناجحة وتصبريني على مشاكلي وأحزاني وتشركيني في أفراحي وأحلامي وتشجعيني زي ما كنتي دايمًا بتعملي. ولكنها سنة الحياة… ولا نعترض على قضاء الله. وإن العين لتدمع وإن القلب ليحزن وإنا على فراقك لمحزونون. ربنا يرحمك يا حبيبتي، ويجعل صبرك كل هذه الأعوام في ميزان حسناتك، ويجمعنا على خير في الجنة يا رب، بدون سابق عذاب. نلتقي في الفردوس الأعلى يا أحن وأطيب قلب في الدنيا كلها. «حفيدتك التي لم ولن تتخطّى رحيلك ملك #اللهم_ارحم_جدتي #اللهم_ارحم_موتانا_وموتى_المسلمين #جدتي #اللهم_ارحم_فقيد_قلبي #🕊️

Malak Mohamed

Open In TikTok:

Region: EG

Tuesday 02 December 2025 19:16:19 GMT