مقعمزة وسط الحوش وترقع في سورية راجلها بعد ما طبقت الحوايج وحطتهم بحداها . ومن غير ماتندري ناضت تجري شدت فردة الشبشب وضربت بيها الزقرلو .. هي تعرف ضربة واحدة ما تسدش .. زداته ضربتين باهيات لين ايبس في مطراحه !! قالت في خاطرها : ستر ربي اللي مافيه حد !! عقابها زقرلو يحوس في حوشي !! زعما من وين طلع .. غبارة كان يتشرتع .. قعدت ادور في الكوجينة ومشت للكنيف .. بالك اطلع منه .. ولت للكوجينة وشافت في التراكين .. قامت الستار .. طلعت القدور .. باهي اللي قفة الخبزة معلقة فوق .. بدت اطلع في الماعين وسط الحوش ودارت رأسها ورأس الزقرلو !! ياهو ياهي في الحوش .. سمعت من يطقطق عالباب . - ياساتر .. زعما البنات روحوا! .. مشت لفم الباب وقبل ماتفتح قالت أشكون . - أني .. أفتحي - عرفتها أختها من صوتها وفتحت الباب - كيف حالك .. وين جيتي - تفضلي .. سكرت الباب وخذت منها فراشيتها - نبي نمشي - فيسع ماطبقت الفراشية وقالتلها هيا خشي من غير تزعبين زايد .. وقبل ماتنشدها عالحوسة اللي في وسط الحوش سبقتها في الكلام . - أسكتى .. الكوجينة كلها طلعتها وسط الحوش على خاطر الزقرلو. - هذا وقته .. - ردي بالك راهو يعشش بعتالي حتى الدواء معاش ينفع فيه !! خيرك ما تسكريش الخرارة بطرف وزرة . - اندير فيها .. البناويت لمّا يسيقوا مرات ينسوا فيها .وديما نقوللهم عليها . - امالا هما وين . - بعتتهم لامي من الصبح .. خوك عنده عزومة ومايبي الا الحاجة الباهية .. والله امي كبرت معاش زي قبل .. وهو مايبيش يأخذ مرأة .. - هذا ما قاله رأسه .. شن نبو انديروله .. حتى أمي قلتلها معاش اديرله شئ .. ناضت فيا .. قالتلي ياللا .. وأني من عندي غيره !! - ههههه خايفة الكنة تاخده منها !! - الحق حتى أمي واعرة .. ديما نقوللها فيها .. ما بعد الكنة كان جاتك.. وين تقدرك .. خلي انديروا طويسة شاهي . - نبي نمشي - غير قعمزي مازال بكري - لا مازال عندي مشيوير بنهوى على جارتي مريضة - باهي تعالي هدرزي غدوا - توه انجيك ضمت الحوسة اللي في وسط الحوش وبعد ما كملت قعدت ادور في اليبرة .. زعما وين مشت .. خيرني اليوم .. الزقرلو دهبلها شيرتها وخلاها حايسة في روحها - @091380gggg